Willem Tjerkstra’s thússide
admin

Keninklik drama

Bibelbylden
PDF Print E-mail
fan Gustave Doré*

De soallen waarden him te hjit,
dat Sedekia flechte mei ’t regear
de stêd út nei it easten;
’t keninklike naam in kear
mei ’t swalkjen tusken bisten.

Fuort rekken takomst en ûnthjit
mei achter him de stêd yn flammen
en Babels jeiend leger;
’t sloech it keninklike lam,
dat gjin ûntkommen seach er.

Hy moast wol sjen, mar ’t die him sear:
fermoarde waarden trije soannen yn
in sucht en foar syn eagen,
dy’t trochstutsen waarden, blyn
is Juda’s foarst ferlege.

Image

* Gustave Doré (1833-1883)
Yllustraasje ‘Nebûkadnessar lit de soannen
fan Sedekia fermoardzje’

admin

Fal fan Jeruzalem

Bibelbylden
PDF Print E-mail
fan ûnbekend*

It like min, it wie net bêst,
it dreunde fan it grutte leger,
want Nebûkadnessar kaam deroan:
Jeruzalem yn lêst
en Zedekia fan de troan.

It koe net minder mei it folk,
it waard de tiid troch hieltyd dreger,
want de honger ware troch de stêd:
wat die noch swurd of dolk
wannear’t gjin minske rekke sêd?

It waard noch minder mei de bres
dy’t slein waard yn de swakke muorre,
want de fijân streamde yn de stêd:
wat joech noch dolk of mes
as minsken trillen as in blêd?

It wie op ’t minst troch fjoer en flecht:
de timpel hat de flammen fuorre,
wylst de kening sloep de poarte út;
eangstbylden waarden echt,
want folk en skatten wiene bút.

Image

* Ut Sint Elizabeth Psalter (sirka 1200)
Yllustraasje ‘De Joaden wurde foar de eagen
fan Nebûkadnessar mei keattings fêstbûn’

Archieven

Zoeken

  • Categorie

  • Datum