Willem Tjerkstra’s thússide
admin

Boerka

Lyrysk Deiboek
PDF Print E-mail
Midden yn it Fryske lân
fan grouwe loften, feale greiden,
smoarge sleatten, rûge reiden,
hâldt moraal it Al yn stân.

Image

Mei it blau fan ’t hege swurk
beklaaide sy har keale leden,
yn de boerka sieten seden
foar harsels en foar it wurk.

’t Al woe ha sy soe yn ’t spier
foar blauwe loften, griene greiden,
skjinne sleatten, kalme reiden,
sedich mei in kleed oer ’t hier.

Mar it Fryske lân wol heal
noch net syn sjarm bedekke litte,
’t liet syn stânpunt stoarmich witte,
de moraal stie doe foar peal.

Image

admin

Fleartiid

Lyrysk Deiboek
PDF Print E-mail
‘k Ha earder oer him dichte,
oer syn wolkehege blom
yn ’t ljocht fan alle dagen langer,
want syn pracht wie ek syn rom,
it wurd hie doe de flear.

Image

Hy hat my net ferplichte,
kom do mei de tiid werom
en spylje wer foar skientmefanger,
want foar letter wied er stom,
gjin wurd mear fan de flear.

Wat is de tiid?
De dyk hat noch syn berm en namme,
’t bûtlân rint it jier troch nei de mar,
de beammen steane noch op stammen,
yn de fierte rint it grutskipsfar
en ’t gea is wiid.

Ik wol wer oer him dichtsje,
oer syn fruchten út ‘e blom
yn ’t ljocht fan alle dagen koarter,
want de ierde freget om
de siedden fan de flear.

Image

Archieven

Zoeken

  • Categorie

  • Datum