De lêste nacht, it spant derom,
mar Tjitte* kin wol sliepe
mei ien punt foar Jelle**, dan de rom,
dochs leit de striid noch iepen.

In lange nacht fan jou dy del,
want Jelle leit lang wekker,
yn de harsens tikket tel op tel,
dat puntsje leit net lekker.

De dei brekt oan mei it berjocht:
it sil mei ’t waar ek heve!
Mar is wyn gjin skippers rjocht en nocht,
al moat er dan ek reve?

Dy middei boazje twirren oan
mei mear as in pear punten:
acht Beaufort, it gûlt op hege toan,
seis skippers dy’t noch stunte.

De spanning brekt, ’t is no wol klear:
De Lemmer hat it helle!
’t Gûlt en ’t streamt dy middei noch in kear:
de soannen mei heit Jelle.

* Tjitte Brouwer
** Jelle Reyenga

Fiif punten foar yn ’t klassemint,
wat kin De Lemmer dan noch barre!
Jelle* is de favorite fint,
hy sil him hjoed flink warre.

De Lemmer is it eigen plak,
de Iselmar mei hege weagen
batst de skipper troch fan rak nei rak,
de wimpel al foar eagen.

Sa tinkt dy dei it eigen folk
op Lemster daam en skip ienriedich,
mar oer bakboard yn in wetterwolk
brûst Earnewâld ûnbidich.

De stielen seachbek hapt rap ta
en sil de Lemster skoat ferfrette,
leaver as syn frou, wol Jelle ha,
sa jilde houlikswetten.

No ien punt achter, ’t kin noch wol,
de lêste wedstriid sil it barre,
Jelle yn de ûnderhûnske rol,
mar moarn wol hy hûnsk farre.

* Jelle Reyenga