Earnewâld, it kin net minder,
der stiet gjin suchtsje wyn, ’t is blak,
mar dochs, ’t publyk ropt: ‘Sile, blinder!’

Sloppe seilen, slepend starte,
soks past net by it skippersfak,
mar dochs, ’t publyk ropt: ‘Sa sil ’t moatte!’

Skûtsjes driuwe sloom en stadich
troch ’t Sigersdjip, as glês sa flak,
mar dochs, ’t publyk fynt: ”t Giet wol aardich.’

Skûtsjes botse, fonken spatte,
dan bome mei sa’n stielen bak,
mar dochs, ’t publyk ropt: ‘Spannend, watte?’

Skippers stake, lizze lekker
en hâlde blakstil har gemak,
mar dochs, ’t publyk fynt: ”t Moat net gekker.’

Seilen strike, hjitte koppen,
protesten tsjin it earste plak,
mar dochs, ’t publyk ropt: ‘Meindert* boppe!’

* Meindert de Groot
fan de Súdwesthoeke
kaam as earste oan.

Is de hertslach ’t ritme kwyt
en hâldt de rêch it roer net mear,
dan wurdt de skipper âld, ’t docht sear,
mar ’t wurdt syn tiid.

Is ’t safier, dan brânt de striid
foar ’t jongfolk los mei yn it brein
it skûtsje spoarend as in trein,
it âlde kwyt.

Aldert*, skipper fan Langwar,
koe starte as in wite swan,
mar sakke, kaam krekt foar de Pan,
’t koe better, mar…

Douwe**, skipper fan de Pan,
seach troch de bril de oaren swart,
’t begjin wie min, in misse start,
’t koe minder, man…

Eldert***, ynfalskipper foar
syn heit, noch hoeden mei it hert,
dat kloppe wol, it woe noch net
skraal sile, mar…

Utslach Grou:
* 11. Aldert Hoekstra fan Langwar
** 12. Douwe Visser fan Snits
*** 13. Eldert Meeter fan Boalsert