De protters foelen fan it dak
fan ’t simmerhúske oan de Ie
en bleauwen fan de hjitte lizzen
doe’t De Jouwer nei it earste rak
de kopposysje nommen hie,
it koe fan ’t jier net misse.

De Jouwer miste foarich jier
de finish, ’t rekke op ‘e kop
ferkeard, it skûtsje bleau doe lizzen,
mar it dreau hjoed troch en waard wiswier
de winner mei it doek yn top,
want kleuren kinne ’t sizze.

De trije kleuren fan it doek
droech Eldert* ek op ’t achterdek,
mar ’t koe de bêste skipper misse,
Drachten showde him de blauwe broek,
in twadde priis wie net sa gek,
twa Annes** soene ’t sizze.

* Eldert Meeter fan Boalsert
** Anne Tjerkstra fan De Jouwer
Anne Hoekstra fan Drachten 

It kaam op harren azem oan,
de mannen fan it wurd,
it leafst net wiet by ’t swurd,
sy joegen oan de skûtsjes toan.

Fan Snits stiek Dicky* der fier út,
syn tonge lei net stil,
mar Feanster Alex’s** wil
dreau elkenien nei in beslút.

Lit Albert*** stil syn gong mar gean,
de man fan út ‘e rie
fiert nei de krekte die,
de pet fan Dicky is syn lean.

Fersulvere is Dicky’s pet,
in ûnderskieding dy’t
fersiert de man mei flyt,
al is er Dick en Alex net.

* Dicky van der Werf fan de skûtsjekommisje Snits
** Alex Brinksma, âld-foarsitter fan de SKS
*** Albert Visser, de heit fan Douwe Visser fan it Grouster skûtsje