Ik wist net wat ik kommen seach,
it ding wie rûn, it hie wat fan in pôt,
in ingel spriek it kleare wurd:
it wie de mjitte foar it nôt.

It leaden lid gie op en del,
sjedêr in frou, dy rekke ek wer wei,
de ingel spriek it kleare wurd:
it kwea moast wike foar de dei.

Ik seach twa froulju yn de flecht
as eiberts mei de mjitte tusken har,
de ingel spriek it kleare wurd:
it kwea gie sa nei Sineär**.

* Yllustraasje ‘Twa froulju mei de nôtmjitte’ (Ted Larson)

** Babyloanië

Ik sloech de eagen op en seach
in rôle yn de loft, it wie in boek,
de ingel frege wat ik seach,
fan ’t antwurd makke hy gebrûk:

‘De rôle fljocht oer ’t hiele lân
as flok foar wa’t him keart tsjin Gods gebod,
de dief en swarder dy’t gjin each
ha foar de oar, slim is har lot;
de rôle kringt by har yn hûs,
dat beide witte fan it rjocht en kwea,
fertarre sille stien en hout,
se sjogge ’t oan en stean foar dea.’

* Yllustraasje ‘Fleanende boekrôle’