Dêr stiet er, Snitser Douwe,
twa kear waard er kampioen
en is dit jier wer favoryt;
hy strielet, hat de slach al wûn
as skipper mei de koarte mouwen.

’t Mobyltsje joech de berte
troch fan Hetty, lytse pop,
foar skipper Douwe favoryt,
dêr kin gjin kampioen tsjinop,
ôf kamen alle skipperspetten.

Dêr stiet er, pake Douwe,
trije kear al kampioen,
de tredde is foar him altyd
en bliuwt de lytse Hetty sûn,
dan stjoert sy ek mei koarte mouwen.

It skûtsjesilen giet fan heit op soan,
al neffens de tradysje.
Spylje genen in foarname rol
of komt it op it foarbyld oan?
Soms rôlet yn it rom in bal.

Dêr stiet er oan it helmhout, Albert Mink,
soan fan de Grouster skipper,
dy’t al mannich kear in wedstriid wûn,
mar Albert maalt net om sa’n wink,
wurdt mei de bal wol kampioen.

Dêr leit er op ‘e lûken boppe ’t rom
en wol net dat syn holle
troch de grouwe gyk lansearre wurdt;
it helm- en gykhout fynt er stom,
it ballear is wat minder hurd.

Dêr stiet er dan, rjochtop yn ’t folchskiprom,
sjocht sykjend om him hinne,
fynt úteinlik achteryn in bal…
in skot as plofte der in bom,
hy spilet mei de bal syn rol.