januari 7, 2024
fan ûnbekend*
Tank ûntdekkers foar de remsliep,
dy’t út it lûde snoarkjen wei
de ljedder setten nei ’t bewuste
fan de kleare dei.
Hoe lang duorret noch it sliepen
mei dreamen fan it komt wol goed
en kalmte yn it ûnbewuste,
want dêr streamt gjin bloed.
Hoe lang moat de wrâld noch wachtsje
op merjes yn de neare nacht
dy’t elkenien klear wekker skodzje
om te sjen wa’t slacht.
Slaan alarm as men net wekker
wurdt, set dan op ’e sliep de rem
en ek de ljedder nei ’t bewuste,
gean foar bern en mem.
Lit de heit syn bern beskermje
wannear’t it sliept om net te sjen
’t ûnskuldich bloed troch de raketten,
mem ûntsjocht har bern.
Tank ûntdekkers foar de remsliep,
de ljedder kaam nei drok beweech
fan beide eagen nei ’t bewuste
libben rap omheech.
* Yllustraasje ‘Ljedder nei it bewustwêzen’
december 24, 2023
fan ûnbekend*
Lit ús harkje nei de komposysje
fan John Cage mei stilte en muzyk,
lit de piano earst mar swije
twahûnderttrijensantich tellen lang
om oan de berteskreau te wijen.
Yn de stilte klinkt de skreau noch lûder
as it blêtsjen fan de keppel skiep
op Betlehems ferlitten fjilden,
de nachtlik neare oeren duorje lang,
om’t dy fan ingels net optilden.
Alle ingels ha ferlein de rûte
nei it fjild fan Gaza, dêr’t de bern
fan klearebare wanhoop skreauwe,
want bommen falle op har fjild al lang…
it is fan ’t godsfolk net te leauwen.
Lit ús diskear net fan frede sjonge,
elke toan wurdt troch in knal oerstimd,
de ingels boppe Gaza swije
twahûnderttrijensantich tellen lang…
it godsfolk lit sels bern lang lije.
Sels it godsbern leit stil yn de krêbe,
harket nei de stilte yn it fjild
dêr’t net ien skiep fan bangens lûd jout:
sântûzen berntsjes in memoriam…
sjedêr ien bern dat noch wat moed jout.
* Yllustraasje ‘Ingels boppe Gaza’