Willem Tjerkstra’s thússide

Archive for the Skiednisbylden category

admin

Bauhaus

Skiednisbylden

fan ûnbekend*
fan Walter Gropius**

Gjin sprake noch fan âlde tiden,
inkeld foarmen foar de sier,
it gie net mear fan heit op soan,
de romantyk wie bombardearre,
dat de kroan foel fan de troan.

Lit Walter Gropius mar bouwe
foar in nije wrâld yn ’t spier
mei strakke foarmen, oeral ljocht,
de keunst waard sûnder mear wurdearre,
dat it folk kaam ta syn rjocht.

It Bauhaus soarge foar de romte,
luchtich, sinnich, sûnder sier,
sadat it libben ljochter waard
en licht om maklik op te fearjen:
optimisme nei syn aard.

* Foto ‘Walter Gropius’
** Walter Gropius (1883-1969)
It Bauhaus yn Dessau

admin

Frije fûgel

Skiednisbylden

fan ûnbekend*
fan Constantin Brancusi**

De swierte fan syn jongesjierren
droech er hiel syn libben mei;
as swalker fan syn alfde ôf
kriich hout en stien him yn de ban,
de fûgel wie in iepenbiering.

Hy seach de fûgel yn de romte
tusken grûn en himel yn,
fan swierte nei in slanke foarm,
hy makke dêr in keunstwurk fan,
woe sa oer grinzen hinne komme.

Soks koe net neffens de dûane:
ynfier fan in stik metaal,
dus sloech it apparaat alarm;
justysje makke dêr wer fan
in keunstwurk út Brancusi’s hannen.

De keunstner stribbe nei de ienfâld:
ideale foarme-taal
nei Plato’s himelhege noarm.

* Foto ‘Constantin Brancusi’
** Byld ‘Fûgel yn de romte’

Archief

Zoeken

  • Categorie

  • Datum