Archive for the Skiednisbylden category

Kom op, jim bern fan ’t heitelân,
de dei fan gloarje brekt hjoed oan,
dus fuort mei alle pommeranten,
stjit de kening fan de troan,
lang libje sil de boargerstân!

Sjoch hoe’t it folk mei stoarmgeweld
oer withoefolle liken rint,
de jonge mei syn twa pistoalen
balt dat hjoed de frijheid wint,
allinnich ’t leave libben telt.

De leafde fan it boppeliif
giet út nei de gewoane man,
hear ’t klappen fan de trikoloare;
doch de adel yn de ban,
sa balt it bleateboarstewiif.

En dêr komt oan de boargerfoarst,
de man dy’t Frankryk rêde sil,
syn namme is Louis Philippe,
harkjend nei de Frânske wil,
mar dy’t úteinlik wike moast.

* Eugène Delacroix (1798-1863)
Skilderij ‘De frijheid dy’t it folk liedt’

Nij-Guinéa,
de Triton sylt al op dy oan,
in ekspedysje mei as doel
it earste fort foar goed bestjoer,
mar sûnder kening op ‘e troan,
it wâld wie dêr in tizeboel.

Nij-Guinéa,
foar ’t earst in flagge op dyn grûn
en wol op kenings bertedei,
it read-wyt-blau heech boppe ’t fort,
de lege bou mei eare jûn,
it wâld derby, de ein fan wei.

Nij-Guinéa,
dyn eigen folk lit him ek sjen
mei pilebôge, siik fan lea,
en stekt soldaten oan, it fort
giet yn de tizeboel ferlern,
de lege bou wurdt wer dyn gea.

* Yllustraasje ‘De Triton ûnderweis nei Nij-Guinéa’

* Yllustraasje ‘Fort Du Bus yn 1828’