Archive for the Skiednisbylden category

Hy riisde op, heech boppe ’t fjild
as joech de Skeppershân in set
om him safier te krijen,
Merapi hold him oan gjin wet,
hat faakris fjurrich him fernije.

Hy liet syn fjurrich aard ek sjen
oan Hollânsk kolonistemacht
út grime om ferdrukking,
Merapi spuide yn de nacht…
syn freon, it hillichdom, gie net ferlern.

Want Boeddha wist fan ivichheid
en doer, dêr gie syn swijen oer
by hege meditaasje
yn ’t hillichdom Borobudur…
Merapi joech ferdivedaasje.

De Skeppers- en de minskehân
ha freonen njonken elkoar set
as heech oprizend teken,
it rinnend fjoer brânt Boeddha net…
wa’t beide skôget, fielt de waarme bân.

* Raden Saleh (1811-1880)
Skilderij ‘De útbarsting fan Merapi yn 1865 by nacht’

* Antoine Payen (1785-1853)
Skilderij ‘Gesicht op Borobudur’

Doe’t ‘Buitenzorg’ de skok fernaam,
bekend paleis op frjemde grûn,
beweegden muorren hinne wer:
in libben keunstwurk nei de fûlste raam,
de stiennen dûnsen yn it rûn
en spilen foar ’t momint as stjer.

Lit keunstners ek nei steechjes gean
mei ’t each op wat earmoedich is,
gjin byld lykwols fan dat ferhaal,
mar ‘Buitenzorg’ kaam wer yn nije klean,
’t gefoel fan dat bestean wie wis,
de taal fan de koloniaal.

** Willem Troost II (1812-1893)
Skilderij ‘De foarkant fan paleis ‘Buitenzorg’ te Batavia
nei de ierdbeving fan 10 oktober 1834′