juli 23, 2017
fan ûnbekend*
Mear- of minderheid,
dêr gie it doe** yn Londen om,
it is mar wêr’t de klam op leit,
de revolúsje of wat stadich komt.
Lenin, bolsjewiek,
kaam foar de earme wurkers op,
de riken hiene net gelyk,
dus moast de maatskippij rap op ’e kop.
Plecharoff syn sicht
as mensjewiek gie fierderop,
gjin fjurrich read, mar earder licht,
gjinien berikt wat mei in gekke kop.
Mear- of minderheid?
De bolsjewiek hat it doe wûn,
wat oan it oantal stimmen lei,
de mensjewiek wie út ’e seal weirûn.
* Foto ‘Lenin’
** Twadde Kongres (1903) fan de Russyske
Sosjaal Demokratyske Arbeiderspartij
juli 16, 2017
fan Albert Hahn*
fan ûnbekend**
Wa’t wurke, moast de hannen brûke,
hold de mûle leaver ticht,
hy hie gjin rjochten, die syn plicht
om ’t libben troch de tiid te lûken.
In inkeling hat him fersetten,
’t waard de oanset fan in tal
dat soarge foar de stakersrol,
sa hat de plicht de rjochten metten.
Wa’t wurk joech, moast de wurkers brûke,
joech oan stakers einlings ta,
se soene trochbetelle ha,
de fakbûn mocht de karre lûke.
De oerheid koe dy winst net sette,
want soks rûn op gaos út,
dat Kuyper*** naam in strak beslút:
hy wurge stakers mei syn wetten.
De akjsje frege om reaksje
fan de stakers op it spoar,
de rjochten spoarden no ris foar
de trein, in kwestje fan de traksje.
De wurkers koene it net winne,
mannich wrotter waard ûntslein,
sa kaam de staking oan de ein
en liet it machtsbestjoer him kenne.
* Albert Hahn (1877-1918)
Spotprint ‘It folk’
** Foto ‘Spoarweistaking 1903’
*** Albert Kuyper, minister-presidint