oktober 29, 2023
fan ûnbekend*
De loop is rjochte op ’e fijân
sûnder dat er him sjen lit
mei syn gesicht nei it geweld:
gefoelens telle net yn fjoer
en reek… wa’t wint, giet troch foar held.
Troch giet it fan de iene nei de
oare, fan Koréa út
nei Gaza, oeral op ’e wrâld
brânt hillich of ûnhillich fjoer,
in bernelyk lit lieders kâld.
Kâld lykwols bliuwe net soldaten
dy’t ferlieze maat nei maat,
fan wa’t de nammen op papier
skreaun wurde, sels ûnhillich fjoer
ferskroeit net ien, sy stean foar wier.
Wa’t net mear stean kin, sprekt de wierheid
swijend út, de oare sit
mei hannen om him hinne slein,
dy’t treastend sprekke nei it fjoer,
foar mannich maat wie dat de ein.
* Foto’s út ’e oarloch yn Koréa
oktober 22, 2023
fan ûnbekend*
Kin in symfony de oarloch keare?
De kâns dêrop is mar hiel lyts;
hoewol’t muzyk de herten rekket,
sjit it fjoer de brân dêryn…
wol harkje nei Shostakovitsj:
‘Ik bin hjoed in symfony oan ’t skriuwen
mei op ’e achtergrûn it lûd
fan bommen troch de Dútsers sketten
op ús reade Leningrad…
wol harkje nei wat jout ús moed.’
Lit de symfony heroysk klinke
as metafoar fan Ruslâns rol
dy’t yn de oarloch fjurrich rôle
om te kearen ’t nazi-fjoer…
wol harkje nei it deade-tal.
* Foto ‘Leningrad yn de Twadde Wrâldoarloch’