Willem Tjerkstra’s thússide

Archive for the Skiednisbylden category

admin

Charles Lindbergh

Skiednisbylden

fan ûnbekend*
fan ûnbekend**

In dûbellibben hjir en dêr,
tichtby de grûn en yn de flecht,
yn frijheid en totalitêr,
it moast foar Charles wol kinne.

De oseaan hold him net tsjin,
sa kaam er fleanend nei Parys,
it wie de Steaten nei it sin,
mei him as held wie rom te winnen.

Hy waard de loftfeartpionier,
ferbettere de fleantechnyk,
de naasje makke gjin beswier
en liet syn hichtemotor rinne.

De Steaten wiene op ien ein
doe’t lytse Charles fermoarde waard,
dêroer is ’t lêste wurd net sein,
soe heit de dieder wêze kinne?

It rûn ferkeard yn Dútslân ôf
doe’t hy dêr dekorearre waard,
’t rasisme brocht him yn it nau,
de naasje liet de held allinne.

In dûbellibben hjir en dêr,
mear froulju joegen him ek bern,
foar har wie hy de loftfeartstjer…
totale frijheid moast dochs kinne?

* Foto ‘Charles Lindbergh’
** Foto ‘Spirit of St. Louis’

admin

Davidson Black

Skiednisbylden

fan ûnbekend*
fan ûnbekend**

Fan Kanadees nei ek Sinees,
syn waarme hert wie rom genôch
foar minsken rûnom op ’e wrâld,
fan prehistoarje nei syn tiid,
hy wie in warber mins.

Black seach de wrâld net yn swart-wyt,
giel ljochte ek noch foar him op,
Sinezen lieten him net kâld;
fossilen fûn er yn har grûn…
de minske stjert en slyt.

Twa kiezzen kamen foar it ljocht,
foar ’t ûndersyk wie dat genôch
om fêst te stellen: hiel lang lyn
bestie der al in Peking-mins,
dy’t kôge, mar ek tocht.

It hert fan Black waard al te rom
troch ’t dollen yn Sineeske grûn,
advizen sloech er yn de wyn
en doe’t it briek, waard hy stienkâld,
syn eigen tiid wie om.

* Foto ‘Davidson Black’
** Ut ‘Davidson Black papers’

Archief

Zoeken

  • Categorie

  • Datum