Willem Tjerkstra’s thússide

Archive for the Mytebylden category

admin

Catilina

Mytebylden

fan Cesare Maccari*

Wa’t stribbet nei ultime macht,
wol krûpe oer de rêch fan oaren,
dy’t er dan de deastek jout,
mar wa’t yn libben bliuwt, fertrout
syn stribjen net en slacht werom.

Wa’t ynklaut, lûkt ferhâldings krom,
en útjout foar it eigen stribjen,
hâldt gjin jild en freonen oer,
de striid om macht wurdt dan in toer,
gjin toer dy’t hy yn Rome bout.

Foar Catilina wie it goud
doe’t hy noch net nei ’t heechste stribbe;
letter skeelde ’t him gjin moer:
hy waard de moardner fan syn broer
en griep fergees yn Rome yn.

Dochs dronk er op ’e takomst wyn,
fertroude op ’e konfrontaasje
mei ’t Romeinske leger, mar
troch ûnmacht hie er gjin ferwar…
wa hat noch om de deade roud?

* Cesare Maccari (1840-1919)
Skilderij ‘Catilina’ (detail)  

admin

Camillus

Mytebylden

fan ûnbekend*



Camillus, hearsker, strider, balling,
yn en foar en troch ’t Romeinske ryk,
in libben hinne en werom,
in rjochte streek en soms ek krom,
gjin jier gelyk.

Diktator om de striid te winnen
tsjin de stêden yn folslein ferset,
sa waard er hearsker mei geweld,
omdat allinnich delslaan telt,
dêrnei de wet.

Mar sjoch ek nei de rjochte streken
fan Camillus by it stedsbelis,
doe’t bern him pakten by it hert
en rjocht waard foar it kromme set,
syn slach wie wis.

In master brocht syn jonges nei it
leger: gizelers yn Romes macht,
wat yngie tsjin it oarlochsrjocht,
de jonges waarden stokken brocht:
‘Jou, master, acht!’

Camillus, hearsker, strider, balling,
Rome loek de hannen fan him ôf,
mar net foar lang, hy kaam werom
en bûgde rjocht wat wie earst krom,
doe streekrjocht trou.

Yllustraasje ‘Camillus’

Archieven

Zoeken

  • Categorie

  • Datum