juni 14, 2019
fan Giovanni Lorenzo Bernini*
Hoe kin in faam no troffen wurde
mei ’t gefolch dat leafde har ûntgiet?
Sjoch mar nei Daphne, wrâldferneamd
troch ’t rûzjen oan de ein, har wurden.
Heit Ladon rûze troch syn weagen,
as riviergod song er faak dit liet:
‘Do dochter dy’t oer leafde dreamt,
do rekkest manlju mei dyn eagen.’
God Eros woe Apollo reitsje
mei in gouden pylk, it wie út wraak,
dat hy fereale waard op har,
de nimf, sy koe mei ’t each fermeitsje.
In leaden pylk hat Daphne rekke,
sa ûntnaam god Eros har de taak
om leaf te ha, sy hie gjin kar,
Apollo koe har hert net brekke.
Heit Ladon hearde Daphne smeken:
‘Lead is swier, ’k wurd leaver in laurier.’
It trof, har wurden rûzen fier,
Apollo droech har ta in teken.
* Giovanni Lorenzo Bernini (1598-1680)
Byld ‘Apollo en Daphne’
juni 7, 2019
fan John William Waterhouse*
Danaos en broer Aigyptos
hiene beide fyftich bern,
Danaos allinnich dochters,
inkeld soannen soe Aigyptos sjen.
Danaos liet daliks witte:
‘Al myn dochters bliuwe frij
fan in houlik mei dyn soannen,
’t brulloftsfeest giet oan har noas foarby.’
Mar de soannen fan Aigyptos
holden as de storein oan,
dat de houliks waarden sletten,
neef mei nicht, in dochter mei in soan.
Danaos liet dat net sitte,
joech syn dochters elk in dolk;
stutsen waarden harren mannen
op Lynkeus nei, dy liet syn folk…
… witte dat de Danaïden
stjerre soene, ek massaal,
neffens fyftich wrekers wetten
spriek er as syn omke ek dy taal.
Yn de ûnderwrâld trochskeppe
sûnder dat it fet fol waard,
diene fyftich drokke dochters,
’t wie de straf foar harren fûle haat.
* John William Waterhouse (1849-1917)
Skilderij ‘De Danaïden’