Archive for the Lyrysk Deiboek category

As it ûnferstân stapt op ‘e fyts
en dronken op syn fuotten stiet,
de kriën krasse deadewacht,
dan is it iepen fjild te lyts
foar libben dat no net mear giet:
dêr leit it offer fan de slacht…

… gjin plak mear yn de keale beam
dy’t skean fan stam net langer stiet
as dizze alderlêste nacht.

Us Leave Hear wol net yn tsjerke bliuwe,
Hy rint it paad del nei it fuotbalfjild
en sil syn doelen tusken peallen skriuwe,
want bobo’s smite sljochtweihinne slompen jild.

Hy lit de stjerren fan de himel falle
en traint de nul-nul bern op ljochtskyndei,
sy spylje mei har lea en hert en holle
en ’t leavehearsbist boartet as maskotte mei.