Willem Tjerkstra’s thússide

Archive for the Lyrysk Deiboek category

admin

Ballade fan Saddam Hoessein

Lyrysk Deiboek
PDF Print E-mail
Hy wachtet yn syn deadesel
op ’t kriezjen fan de stielen doar,
al dagen klinkt gjin lûd mear troch,
mar hy is wach, jout him net del,
oertinkt de skiednis, nei en foar.

Lang lyn, foar him it oermodel,
behearske Babels ryk de wrâld,
syn kening seach it hear ris oer
en op it hiele minskdom del,
it djippe lijen liet him kâld.

Image

De keale muorre ljochtet op,
de sel wurdt tsjuster by dit byld:
de kening yn de greide friet
it gers, dwylsinnich yn de kop.
Dy skiednis makket him net myld.

Hy hatet noch it Perzenryk,
dat wiske Babels gloarje út,
syn wraak wie oarloch tsjin Iran,
hy maalde om gjin leed en lyk,
ultime macht wie him ta bút.

As tank foar Allah’s stipe joech
er syn soennitysk moslimbloed
as inket foar it skriuwen fan
de hillige Koran, sa droech
er ’t offer op mei passygloed.

Hy skrillet op fan ’t eigen lûd
en pakt fan ’t buordsje de Koran,
it selskip dat him liede sil.
Net Allah helpt him yn syn noed,
in rjochter docht him yn de ban:

Saddam Hoessein, jo wiene grut
yn eigen eagen, seagen del
op ’t folk dat yn it lijen siet,
it hert bestoar it op jo wurd,
de dea marsjearre op befel.

De oanslach op jo libben liet
gjin inkel minske bûten skot,
de manlju stoarren yn de loop,
ûnskuldich oan de wanhoopsdied,
de rest siet mûldea achter slot.

De Koerden ha ik it net oer:
jo gemysk ûndersyk fan hoe’t
de azem ’t bêste ôfsnien wurdt;
de proef wie mar fan koarte doer,
mar slagge wol ûnminsklik goed.

It rjocht sil sprekke oer jo died
fan wraak: de straf foar minsken dy’t
gjin rjocht dien is en dêrom sprek
ik hjoed út namme fan de ried:
jo reitsje moarn de azem kwyt.

Hy skrillet op en riist fan ’t bêd
by ’t kriezjen fan de stielen doar –
de eagen waarden dochs noch swier? –
en sjocht syn fijân dy’t him rêd
ferfiert, sa giet er nei de oar.

Syn eigen folk is no de oar,
de boal, him winskjend nei de hel,
in swarte doek komt om syn hals:
de dirigint fan ’t moardnerskoar
dy’t tikket nei de lêste tel.

Image
Foto LC/Reuters

Hy fielt no sels de strakke strop
dy’t lei om ’t libben fan Irak
en as de boaiem sakket wei,
dan hâldt de azem stûkjend op,
mar jout de dea him wol syn plak?

admin

Foar wûnder

Lyrysk Deiboek
PDF Print E-mail
Heilswier hingje loften
boppe ’t leechlân fan de snein
dy’t ik besjoch al rinnend
op ‘e wei noch sûnder ein,
wylst fûgels slaan yn kloften
op ‘e flecht foar wit net wat,
ferwachtsje ik te winnen
’t ljochtsjend heil fan wat is dat?

Image

Binne dat de greiden
yn de skaden fan de moarn,
ferskûlje noch de kimen
har as wie de fierte stoarn
en rint de wei wol nei de
blauwe printen ivichheid
dy’t no ferdriuwt de skimen
en it ljochtsjend heil oanseit.

Image

Kin men dan noch swije
yn in wrâld mei loften swier
fan brekkend ljocht en sûnder
heilleas driuwen nei in fier
ferline fol fan lijen?
Sjongend rin ik oer de dyk,
belibje it foar wûnder
mei de skiep as myn publyk.

Image

Archieven

Zoeken

  • Categorie

  • Datum