Willem Tjerkstra’s thússide

Archive for the Lyrysk Deiboek category

admin

Klaverblêd

Lyrysk Deiboek

As wiene se op stokjes prippe
foar fersiering bûtendoar
fanwege grizens yn de winter,
sûnder kleur giet nocht teloar,
swart-wyt kin oan ’t palet net tippe.

Sy witte neat fan komposysje,
ha har deljûn mei as doel
de kop te stekken yn de fearren,
ôf te wêzen fan ’t gefoel
om deis mar wer de kop te hysjen.

De foarm kin lykwols sprekken lije
as in klavereftich blêd,
dat him no foardocht as keunstsinnich,
mar it sa net oeren rêdt…
it moarnsljocht kin de skets ûntwije.

admin

Gewurde litte

Lyrysk Deiboek

Yn streken bringt de boer syn risping
neffens wat syn aard him seit
oer de groei yn de natoer,
dus lit er hege spoaren achter,
dêrfoar is er boer.

Hy lit de greide net gewurde,
soks giet yn tsjin syn natoer,
dy’t him oandriuwt nei it fee,
dat winterdeis op fretten wachtet,
dêrfoar is er ree.

Mar sjoch, dochs moat er wol gewurde
litte greidefûgels yn de groei
dy’t it nêst ferlitten ha,
in kwestje fan it libben achtsje,
dêr moat elk op ta.

Archief

Zoeken

  • Categorie

  • Datum