Willem Tjerkstra’s thússide

Archive for the Keunst category

admin

Op ‘e nij ferdreaun

Keunst

fan Peter Paul Rubens*

Wêr binne de twa ingels bleaun
no’t hjoed de dei ek bern noch
flechtsje moatte foar de macht
fan beulen, honger en geweld,
it bliuwt foar harren altyd sneon.

Sy kinne net nei skoalle ta,
de snein wurdt harren ek net
gund, sy bliuwe yn de nacht
fan wekker wurde nei in dream
oer merjes, folle mear as twa.

Gjin byld fan ingels ûnderweis
en heit en mem mei ’t lytse
bern, de ezel mei syn fracht,
de dream dy’t oars ’t ferhaal fertelt:
beskerme troch dy twa op reis.

Wêr binne de twa ingels bleaun
yn dizze sekuliere
tiden mei fassisten oan
de macht, de kroan op stream nei stream…
it bern wurdt op ’e nij ferdreaun.

* Peter Paul Rubens (1577-1640)
Skilderij ‘De flecht nei Egypte’

admin

Tusken Sint en Jezus

Keunst

fan Jan Steen*

It barde tusken Sinteklaas
en Jezus-yn-de-stâl spontaan:
de ynstruminten kamen samar
foar it ljocht en beppe socht
har sjongboek op, wylst pake
skonk himsels in wyntsje yn:
‘Makkers, staakt uw wild geraas!’

De fluit klonk en de doedelsek
begûn syn deuntsje ek te jaan,
wylst beppe hege toanen kraaide,
foel de mem mei ’t berntsje yn
en proaste pake op it
krystbern, blafte ek de hûn:
‘Wellekome op ons plek!’

Doe’t pake ’t lêste slokje naam,
brocht de fioele him yn ’t sin,
hy moast ek achtslaan op ’e snaren,
foar it krystbern en bernsbern
begûn er jankend op te
spyljen: ‘Op is alle wyn,
nu zijn wij hier blij tesaam!’

* Jan Steen (1626-1679)
Skilderij ‘De fleurige húshâlding’


Archieven

Zoeken

  • Categorie

  • Datum