Archive for the Keunst category

Heit tsaar ropt Ruslâns soannen
ta de striid tsjin Turksk geweld,
der is mar ien ferhaal dat telt:
drink by it ôfskie en it wersjen
út deselde boarne.

Sy steane om him hinne
as famylje yn de striid
fan noch mar koarte, djippe tiid;
hoe soe men net út oansjen peile,
nimmen sil it winne?

Dat pake ôfstân nommen
hat, syn libben as rekrút
begûn ek nei de lêste tút,
hy kin de djipte ’t bêste peile,
sa’t it is, sil ’t komme.

Sil dan ’t gefoel net rinne
wylst sy heart der frjemd fan op,
in skot by elke herteklop?
De drippen út har eigen boarne
binne ôfskiedstriennen.

* Ilja Repin (1844-1930), in Russyske skilder,
hat yn de twa jier dat er dwaande wie
mei ‘Ofskie fan de rekrút’ in protte stúdzjes
makke.
De rekrút is oproppen om tsjinst te dwaan
yn de Russysk-Turkske oarloch (1877-1878).

In ramp is gau fergetten,
’t wetter spat mar efkes op,
in finzenis hat dikke muorren,
smoart de klap en martelrop,
want soks past yn de ierdske wetten.

Se sieten beide finzen,
heit en soan op Kreta’s strân,
doe makke Daedalus fan fearren
wjukken, ien oan elke hân
fan Icarus, hy koe oer grinzen.

De soan fleach nei de sinne
tsjin de wize rie fan heit,
sadat de waaks begûn te rinnen,
’t wjukleas fleanen waard in feit
en frijheid wie net mear te winnen.

It wetter hat wol spatten,
mar de boer, hy ploeget troch
en hoeders passe op ‘e bisten,
bolle seilen lûke doch?
Noch efkes blinkt in skym fan fuotten.

* Pieter Brueghel (sirka 1525-1569)
brocht siswizen yn byld, ûnder oare
‘hoogmoed komt voor de val’.
Hy hat foar dizze siswize de myte
fan Daedalus en Icarus brûkt.