Archive for the Keunst category

Mar ’t mânske doek, goed fiif by acht,
lit net de oare side sjen,
Napoleon syn machtich leger
dat flechtet yn de neare nacht,
de keizer hat de slach ferlern.

Hy stiet wol op it skilderij,
de kroanprins fan ús Nederlân,
mar oan de kant en licht ferwûne,
hy wie as held der gloeiend by
en holp syn maten út ‘e brân.

Kin ’t oars as yn it middelpunt?
Dêr sit er, hartoch Wellington,
mei rjochte rêch heech op it hynder,
syn sege liedt noch ta in stunt:
Helena foar Napoleon.

* Jan Willem Pieneman (1779-1853)
makke fan de slach by Waterloo
in skilderij fan 567 x 836 cm.,
dat kocht waard troch kening Willem I
foar syn soan, de lettere kening Willem II,
dy’t as kroanprins meifochten hie.

Wa hie gjin bylden fan de tekenseal
yn ’t hûs fan ‘Lokkich troch Fertsjinste’
dêr’t it kulturele folk fan Amsterdam
kaam foar de keunsten en de winsten?

Sjedêr de keapman skôgjend doek en print,
dy’t freget: ‘Wat wurdt myn fertsjinste?’
Saaklik sjocht er ’t keunststik oan, net op in sint,
op keunstgebiet is hy de minste.

Sjedêr de samler skôgjend print en doek,
dy’t ynfloed ha op djippe tinzen,
saaklik skriuwt er alle stikken yn syn boek,
it keunstbehâld is syn fertsjinste.

Sjedêr de keunstner mei syn rûn palet,
yn ’t bûnte selskip net de minste,
realistysk hat er earste streken set
noch sûnder each foar syn fertsjinste.

Wa’t lykwols sit as byld sa glêd en eal,
in Grykske god mei hege tinzen,
is de jonge Felix, soan fan Amsterdam,
dy’t lokkich is troch syn fertsjinste.

* Lokkich troch Fertsjinste

** Adriaan de Lelie (1755-1820)
lei him foaral ta op it skilderjen
fan portretten.