Willem Tjerkstra’s thússide

Archive for the Keunst category

admin

Judit mei it swurd

Keunst
PDF Print E-mail
fan Artemisia Gentileschi*

Image

Kin in frou it swurd wol drage?
Freegje ’t oan de frou dy’t Judith hjit
en alles fan de wredens wit
fan dy soldaten sûnder fragen.

Holofernes kin fertelle
fan syn leger, read fan frouljusbloed,
wit noch fan juster en fan hjoed,
syn oeren kin er lykwols telle.

Judith, frou fan neat tefolle,
draacht it swurd oars as in generaal,
mar slaan, dat docht se mei in haal
of twa en sjoch, dêr falt de holle.

Hiel Bethulia moat witte
dat it swurd dript fan it manljusbloed;
it antwurd op ‘e fraach fan hjoed:
dat die in frou dy’t Judith hjitte.

* Artemisia Gentileschi (1597-1651)
wie de earste frou dy’t oannommen waard
op ‘e Akademy yn Florence.
Holofernes, de generaal fan Assyrië,
waard by de belegering fan de stêd Bethulia
troch Judith ûnthalze.  

admin

Allegory fan it sicht

Keunst
PDF Print E-mail
fan Jan Brueghel en Peter Paul Rubens*

Image

It is mar hoe’t men it besjocht,
gjin minske-each is krekt gelyk
en op itselde rjochte,
’t iene sjocht it inkeld ljocht
en ’t oare yn it tsjuster bryk.

Mar skilders litte alles sjen,
teminsten twa dy’t derfoar gean
as duo yn profesje:
Rubens dy’t de minske ken,
foar Brueghel leit gjin lânskip skean.

Sjedêr it lânskip fan it atelier
mei útsicht op noch folle mear
troch mannich striel ferljochte;
beide skilders binne ree,
sy wurken foar de fisy gear.

* Jan Brueghel (1568-1625)
en Peter Paul Rubens (1577-1640)
hawwe yn oparbeidzjen
‘Allegory fan it sicht’ skildere.
Brueghel makke de lânskippen
en it atelier, Rubens stie noed
foar de persoanen.

Archieven

Zoeken

  • Categorie

  • Datum