Willem Tjerkstra’s thússide

Archive for the Keunst category

admin

Wolnee, it is net oars

Keunst

fan Caspar Netscher*

Jawis, hoe soe it oars,
de kaam moat troch de krollen,
lit it boartersguod mar lizze,
de kat rêdt him dêrmei…
it bern jout wol om sizzen.

Wolnee, sy tinkt net oars
as om har eigen berntsjes,
beide mei de langste krollen,
sy rêdt har dêr wol mei…
wêrom soe sy oars wolle?

Jawis, sy hat oars wol
heard fan de bern op strjitte,
fierderop ferwûne lizze
of slim genôch foar dea…
wat moat sy dêrfan sizze?

Wolnee, it is net oars,
men kin net alles witte,
soe it leafst foar bern oars wolle,
want deadzje wol men net…
wa krijt soks yn de holle?

* Caspar Netscher (1639-1684)
Skilderij ‘Memmesoarch’

admin

Drinkend sjonge

Keunst

fan Adriaen van Ostade*

Se ha gjin lêst fan stikstof,
ek net fan tefolle dong,
’t probleem fan CO-twa
lit haren laitsjend kâld,
troch ’t krûkje bliuwt men jong.

Se nimme hjoed in slokje,
jouwe troch de folle krûk,
der is genôch foar twa,
it bern is noch te jong,
hat soms in wiete broek.

Sy fûn yn ’t laad in boekje
mei wat ferskes foar de fleur,
want wille wol men ha,
fan beide wurdt men waarm,
sa krijt it libben kleur.

Genôch stof, nee net stikke
fan de drank en fan de sang,
it libben laket ta
oan wa bliuwt ivich jong,
dy’t lucht krijt, libbet lang.

* Adriaen van Ostade (1610-1685)
Skilderij ‘Sjongende boeren’


Archieven

Zoeken

  • Categorie

  • Datum