Archive for the Bibelbylden category

De Iene liet Sacharja sjen
wat Hy fan doel wie yn it tiidsferrin,
in ingel spriek dêrby it wurd,
sa kriich it byld in djippe sin.

Ik sloech de eagen op en seach
wol fjouwer hoarnen, driigjend op in kop;
ik frege:  ‘Sis my wat betsjut
dit skerpe byld dêr boppe-op?’

De ingel spriek it wiere wurd:
‘De hoarnen hawwe útinoarren slein,
sadat it folk bleau jierren fuort,
mar sjoch, dat wie noch net de ein.’

Ik seach yndie in twadde byld:
wol fjouwer smidden, driigjend sa te sjen;
ik frege: ‘Sis my wat betsjut
dit byld, is no de slach ferlern?’

De ingel spriek it wiere wurd:
‘De fjouwer smidden houwe hoarnen ôf,
want folken hawwe izerhurd
west, brochten Sion yn it nau.’

* Byld ‘Profeet Sacharja’

De Iene liet Sacharja sjen
wat Hy fan doel wie yn it tiidsferrin,
in ingel spriek dêrby it wurd,
sa kriich it byld in djippe sin.

As earste kaam it fisioen
fan mannich hynder, read en brún en wyt,
de ruters krigen doe it wurd,
de wrâld koe tsjûgje fan har flyt.

Se rieden hiel de ierde oer
mei iepen each en ear, der hearske rêst,
faaks wie it no de tiid fan ’t Wurd
dat klinke soe: de ein fan ’t lêst.

De Iene spriek de ingel oan,
’t wurd dêr’t Sacharja noch gjin ear foar hie,
de toan wie myld, in freonlik wurd,
de ingel joech de godsman rie:

Lit hearre oan Jeruzalem:
de Iene brânt fan leafde foar de stêd,
syn hûs wurdt boud, byld fan it Wurd,
de oerfloed makket Sion sêd.

* James Tissot (1836-1902)
Yllustraasje ‘Sacharja en de ingel’