Posted by admin

’t Wie waarm en ’t folk siet sûnder swiere seilen
nei it sloppe tugespul te sjen,
it hie derfan as wie de skûtsjedei ferlern,
it grutste part biet op te koarte neilen.

It gie net langer om de earste plakken,
want dy wiene foar It Fean en Grou,
dy kamen net mear op ‘e Snitser mar yn ’t nau,
de stille spanning siet by oare bakken.

Wol fjouwer skûtsjes koene tredde wurde,
’t lot lei yn it twirjen fan de wyn,
dy hold it spanningsfjild der oant it lêst ta yn
fan ’t wifkjend seil oant ’t triljen fan de swurden.

De Jouwer hat it mei in meter helle
op ‘e streek en kriich in eareplak
nêst Grou en ’t Fean, dat yn de blakte mei sa’n bak,
it wâlpublyk koe noch oant trije telle.

De hiele Fluezen kleuret blau
mei hjir en dêr it donkerbrún
fan skûtsjes foar de start,
de hals noch op, it hoecht net gau
derhinne foar’t de loop him wart.

Mar klinke skotten, dan is ’t dien
mei ’t heale spul, se gean foar fol,
it earst It Hearrenfean,
syn kâns op ’t earste plak is grien,
it hat it túch der skoan op stean.

En nei de striid it kommentaar:
It Hearrenfean rûn as in trein
en hat fertsjinne wûn,
fansels, it wie ek krekt syn waar,
dus is er noch gjin kampioen.