Readen en witen

fan ûnbekend*

Read fan it fergetten bloed,
it folk tsjin adel en de tsaar,
it moarnsread fan it nije.
Wyt fan ‘suver hat it west’,
’t ferline is ek goed foar hjoed,
lit ús dat oan de takomst wije.

Read tsjin wyt, in felle striid
fan generaal tsjin generaal,
dy’t beide ’t lân wol lije
meie; wyt Europa tsjin
de reade rest… in nije tiid?
De Rus lijt ûnder twa partijen.

Fan it fiere east oant west
fertelden readen ’t einferhaal,
se soene ’t bloed net mije;
Lenin skreau de wetten foar
op grûn fan ’t âlde manifest,
Marx mocht syn erfenis wol lije.

* Fotokollaazje ‘Russyske boargeroarloch’