It rûzet de provinsje oer:
de mêst fan Snits moat koarter,
mar ynkoartsjen is in poepetoer,
’t foarútsicht wurdt sa swarter.

De skûtsjes hongen foar in proef,
ien skeaner as de oare,
mar it wetter mocht net yn de roef,
elk skip kriich sa in score.

Guon piipster skûtsjes, rûn fan foarm,
ha net de proefnoarm helle,
op sân skippen klonk reëel alarm,
mar ek it lûd fan skellen.

De SKS bûn daliks yn,
want mei de helte sile,
like op it byld fan lang ferlyn,
doe’t noch gjin proefnoarm spile.

It byld giet de provinsje oer:
Snits hat allinnich ûnder
holden, mar mei Douwe* oan it roer
rint hjoed de Pan foar wûnder.

Foto: Friesland Post juli 2000

* Douwe Visser

De Feanhoop fart in fêste koers:
in heale ieu organisaasje
fan de wedstriid op it smelle wiet,
dus faak sensaasje by de rûs,
mar hjoed in silersfeest mei graasje.

It Drachtster skûtsje leit op koers:
in skip ferbûn oan de tradysje,
dus gjin racer sa’t it oaren giet,
wol foar de kop it stridersbrûs,
hjoed sille se de flagge hysje.

Gjin skip leit lykwols hjoed op koers,
it is in wedstriid sûnder faasje,
om’t Aeolus gjin presintsje biedt;
de Pan, de winner, skriuwt nei hûs:
’t Lei net oan de organisaasje.