Wurdt it wol of net in reef,
it leit deroan hoe hurd it waait,
it iene skip is ’t oare net;
gjin skipper wol syn skûtsje leit
foar Pampus, leaver is ’t op dreef.

Wurdt it Snits of is it Grou,
dy beide sile hjoed foar fol
en ha fan minder gjin ferlet,
mei romme wyn de seilen bol,
foar Pampus leit lykwols de frou.

Gie it foar De Lemmer mâl
genôch en hâldt dy dermei op?
Pyt seach in fallend blok te let
en kriich it streekrjocht op ‘e kop,
foar him is Pampus hjoed de wâl.

It binne reuzen yn de start,
ticht byinoar, de striid foar ’t plak
om earst útein te setten;
it fjild is lyts, de streek is koart,
by ’t knallend skot de skoaten strak,
de wyn en weagen komme letter.

Doarp Grou knypt ûnder elk skip wei,
mar sylt de waring noch net fol,
de swurdeman wol wetter;
Wâldseins posysje liket faai,
dêr komt de griene harsens al,
De Lemmer hat syn eigen wetten.

De twirre falt der fleanend yn,
de wegen batse tsjin it board,
de swurdeman hat wetter;
Doarp Grou krijt nocht oan dizze wyn,
wurdt fierwei earste fan de float
en kin de wimpel hast besette.

Wâldsein syn reus leit ek al fêst,
besylde hjoed it fjirde plak,
sjedêr de dwerch dernêst.