De fjirtjin binne yn de sleep,
de touwen steane strak,
elk skûtsje is no noch op dreef
en stribbet nei it earste plak.

De liuw hat lok, giet earst fan start,
springt fier en rint derút,
mar wit net wat der fierder bart,
rûkt foar de finish al de bút.

Mar sjoch, in poat grypt nei de wyn,
dy’t mar net komme wol,
de twadde griene* rint rap yn,
út is de liuw syn helderol.

* De Lemmer

De skûtsjes kleurje frijwat saai
ferlike mei de iepen boat
fan de kommisje,
wat te krijen hat op dizze dei
mei delfal op ‘e float.

Hoewol’t it ôffalt mei de striid,
krijt tafal hjoed gjin inkeld plak
fan de kommisje:
elk syn rol, mar alle eagen wiid,
bestjoere is in fak.

It Jouster skûtsje leit foaroan
mei skipper Peter* of mei Baint**?
Foar de kommisje
is it roer foar skippers as in troan,
dus Baint is mar feint.

* Peter Syperda wie opereard oan in hernia
** Baint Kramer wie syn ferfanger