De skûtsjes binne langer wurden
om mear faasje oan it skip te jaan,
it giet op ’t lêst om earst te wurden,
yn it klassemint in gat te slaan
en sa de konkurrint te pakken.

De start kin noch gjin sprekken lije,
mar de swetser hat syn oardiel klear:
mei ’t Lemster skip sil it neat wurde,
fierste koart, dus oan Langwar de ear
om knipend ’t earste plak te krijen.

In twirre kriich Langwar te pakken,
lei it skûtsje samar op ien ear,
wat jouwe dan noch roer en swurden…
de bemanning wit it ek net mear,
’t moreel is nei de boaiem sakke.

De striid giet troch mei tolve skippen,
want de liuw is ek al fan de mar,
mar sjoch, De Lemmer hat it makke:
koart en rap, it brein is yn de war,
de swetser ek mei rappe lippen.

In suchtsje hjir, in twirke dêr
en fierderop blakstil,
it woe net neffens skippers wil,
de sigaret as skûtsjestjer.

Mei fjirtjin yn it earste rak,
elk hie de romte wol,
mar by de kapboei waard it fol…
de kop derby, nei ’t bêste plak!

De Jouwer dreau de oaren op
en krong der tuskenyn,
de fok fernaam ynienen wyn…
de kapboei kaam rjocht foar de kop.

It stoarme oer it flakke wiet
fan kloatsek oant protest,
De Jouwer slagge foar de test
‘spring op ‘e boei, sjoch hoe’t dat stiet’.

Mar Eldert* hie dat net oan tiid,
want mei de parasol
hie hy de beide hannen fol…
ek oan ’t protest, dus út ‘e striid.

* Eldert Meeter