Willem Tjerkstra’s thússide
admin

Boskbrân

Keunst
PDF Print E-mail
fan Piero di Cosimo*)

Image

It linker each lûkt nei it hôf fan Eden,
’t rjochter nei de minske, Adams flecht,
mar beide jouwe grif de wiere reden:
swarte wolken reek as stjerrend echt.

Gjin inkeld wurd oer fjoer yn ’t hôf fan Eden
of wie ’t reek, grimmitigens fan God?
Gjin stream dy’t holp, gjin wetter of gebeden,
rikjend dreau Hy út, har ierdske lot.

Seach Cosimo it paradys op ierde
by Florence, stêd fan Dantes hel,
dêr’t alle sûnders nei de djipte glieden,
fjoer dat friet troch fearren, hûd en fel?

As iepenbiering yn de lêste dagen
dat de ierde stiet yn fjoer en flam,
wannear’t it Adamsfolk stelt loaze fragen
oer de jiske fan de lêste stam?

Wolnee, Piero de clown mei tûzen fiten
kleure troch syn fantasy it doek,
sa koed er paradys en eintiid slite,
karnaval as fjurrich bibelboek.

* Piero di Cosimo (sirka 1462-1521)
wie in skilder út Florence,
dy’t ek bekend wie troch syn fantastyske
útfinings foar it karnaval.

admin

Ferkrêfting

Keunst
PDF Print E-mail
fan Edgar Degas*

Image

It is net by him boppe kommen
doe’t er beide oanbrocht op it doek,
hy hie foar eagen ’t ledikant,
in kistke mei in wite doek
en op ‘e wand behang mei blommen.

Sy socht yn ’t laad fan de kommoade,
mar dat wie fansels mar flauwe kul,
hy kaam deryn, grimmitich want
sy hiene heech oprinnend spul,
ynwindich koed er har wol smoare.

Der kaam lykwols by oaren boppe
’t driigjend klikken fan de kaai yn ’t slot
en spieren oant it uterst spand,
begrutsjen om har kommend lot,
want kin in tichte kiel noch roppe?

Noch brânt de pit fel fan de lampe
en leit op bêd de strakke sprei,
de driging komt net fan dy kant,
want tsjin de doar stiet dûbeld hy
te sjen hoe’t har de lea ferkrampe.

* Edgar Degas (1834-1917)
wie in Frânske tekener en skilder
dy’t de boargers en artysten
fan Parys skerp observearre
en werjoech sa’t se wiene.
Letter is de titel ‘Ferkrêfting’
oan dit skilderij jûn.

Archieven

Zoeken

  • Categorie

  • Datum