Willem Tjerkstra’s thússide
admin

Endymion

Mytebylden

Endymion
fan Francesco Solimena*

In soan fan Zeus, Endymion,
seach klear de moanne skinen,
in knypeach fan Selene**,
yn de goadewrâld neamd Artemis,
sy soe him om de finger wine.

Wol fyftich dochters skonk sy him,
it wiene kreaze fammen,
knypeachjes fan Selene
út ’e oare wrâld, hy wie der wis
fan dat sy foar de goaden flammen.

Selene woe Endymion
net troch de dea ferlieze,
sy liet him ivich sliepe,
brocht de nachten by him troch, neat mis
mei sa foargoed foar him te kiezen.

* Francesco Solimena (1657-1747)
Skilderij ‘Selene (Artemis, Diana) en Endymion’

** Goadinne fan de moanne

admin

Fanselssprekkend

Keunst

fan Georges Rouault*

Sprek út wat rjocht is yn de wrâld,
de rjochters ha it foar it sizzen
yn opdracht fan de steat,
de hoer is net oan it bewâld,
sy moat faak ûnder lizze.

Sjedêr de prysters dy’t it rjocht
fertraapje foar wa’t boppe lizze,
yn opdracht fan de steat,
de hear hat lang noch net syn nocht,
hy hat it foar it sizzen.

De steat en rjochters tsjinje god,
dy’t niget hat oan macht en riken,
ta elke die yn steat,
sy misse net it heechste bod,
wat docht út sprekken bliken.

* Georges Rouault (1871-1958)
Skilderij ‘De trije rjochters’

Archief

Zoeken

  • Categorie

  • Datum