Snits de stêd mei stoom en faasje
oer it wetter en it spoar,
ûntspoarde mei de sinteraasje,
dêr wie de provinsje foar.

Stichting Stoomtrein Fryslân spoarde
stomend op in botsing ôf,
om’t Ljouwerts koalen minder scoarden,
wie de reek fan lilkens blau.

De provinsjemasiniste
sette doe it sein op read
omdat dy reek ’t miljeu ferpeste,
yn ’t ferkearde kielsgat skeat.

Oerlis yn de restauraasje
sette ’t spul wer op it spoar.
De fraach is oft de Fryske naasje
wol op stoom bliuwt mei elkoar.

Spitich dat it sa mislearre
om’t ús Schokker skokte mei in stunt,
want oars wie Fryslân opwurdearre
ta it peil dat elk ús lantsje gunt:
geheime tsjinst, dêr moatte wy op ta,
sjoch Ruslân en Amearika!

Grutte Broer of Grutte Suster,
each en ear is net oan sekse bûn,
se binne hjoed grif net fan juster,
witte fan de sturt en fan de hûn,
mar eigen sifers mocht gjin minske ha,
sjoch Ruslân en Amearika!

Tinne muorren hawwe earen,
fûn it each fan Grutte Suster út,
de fraach wie hoe ’t gehoar te kearen,
resolút naam sy in waaks beslút:
net ien op wacht foar it berie, mar twa,
sjoch Ruslân en Amearika!

De skok fan Schokker wie in flater,
spitich dat it sa mislearre is,
want no sit Fryslân mei in kater:
gjin geheime tsjinst sa goed as wis,
wol dikke muorren sil it nije ha
fan Ruslân oant Amearika!