De boer hat hjoed gjin melkerij
en hoecht ek net mei dong te kroadzjen,
want foar dea, sa lizze dêr de kij,
hy hat de pest yn om dat soadsje.

De boppelaach komt om te sjen
nei wat him foardocht as spektakel,
mar de boer hat al syn fee ferlern,
besjocht de pest*** as in debâkle.

Fan dier nei minske, mar gjin pest,
de goalera**** slacht ta op ’t winken
fan de dea, de sike hat der west,
gjin weet fan smoarch grêftwetter drinke.

De boppelaach komt net te sjen,
hat op ‘e goede ôfrin dronken,
mar wa’t ûnder leit mei trettjin bern,
wurdt yn it grêf ta keale bonken.

* Yllustraasje ‘Kowepest’

*** Kowepest yn Nederlân (1865)
**** Goalera-epidemy yn Nederlân (1866)

Hear it klappen fan it doek,
sels yn it fiere Yndia,
dêr giet it op it jeien ta
op bern, de keapman eaget tûk.

Fiel it oangean fan de wyn,
dy’t gûlt lykas oan board it bern,
it lijen is him oan te sjen,
hy giet as slaaf de frjemdte yn.

Rûk hoe’t stjonkt de neare dea,
dy’t opkomt út it folle rom,
de weach bedobbet mei syn skom
de lang noch net folwoeksen lea.

Sjoch ’t oranje, blanje, bleu,
dat kleuret ek Batavia,
dêr moat de hannelswaar op ta,
de rop foar ’t lytse fee is heu.

Wit oan alles komt in ein:
as ’t slavebern gjin priis opbringt,
it jild út oare hoeken winkt,
dan wurdt de slavernij ûntslein.

* Erwin Jules de Vries (1929-…)
Byld ‘Slavernijmonumint te Amsterdam’