maart 23, 2024
fan ûnbekend*
fan ûnbekend**
Wat kin druk betsjutte
foar in folk yn hege need?
Syn takomst wurdt ûntnommen
as gjin bern it libben hâldt…
hoefolle binne der omkommen?
Sjoch earst yn Egypte,
dêr’t de bern fan Israel
de takomst waard ûntnommen,
sy ferdronken yn de Nyl…
hoefolle binne der omkommen?
Lit no dit ferline
sprekke foar datselde folk
of is it lûd ferstomme
fan it gûlen fan de bern…
hoefolle binne der omkommen?
Sjoch dan no yn Gaza,
dêr’t de Palestynske bern
mei tûzenen opromme
wurde troch datselde folk…
hoefolle binne krekt omkommen?
Wat kin druk betsjutte
fan bûnsmaten by de fleet
as wurden net oerkomme?
Hâldt datselde folk him stom,
smyt yn de Negev tolve bommen.
* Foto ‘Nyl’
** Foto ‘Negev-woestyn’
maart 22, 2024
fan ûnbekend*
Wa soe net lokkich wurde
by it útsicht oer de Lucky Bay
en fierder oer de oseaan?
James Cook waard lokkich doe’t er seach
de kusten fan Australië,
hy soe foar Ingelân syn slach dêr slaan.
Wêr’t blanken lokkich binne
mei it útsicht op de Lucky Bay,
lit ek de kangeroe him sjen
en bloeit folop de banksia
op flakten achter strân en dún,
mar gie sûnt Cook’s ûntdekking neat ferlern?
Want lokkich waard de takomst
net foar Aboriginals,
sy rekken har tradysje kwyt;
wylst blanken hiene jild op ’t each,
ferlearen sy it sicht op wei
nei har identiteit, it âlde liet.
* Foto ‘Lucky Bay by Australië’