maart 31, 2024
fan ûnbekend*
It nijs komt út it easten
dat it westen fia him berikt
dy’t demokratysk keazen is,
mar diktatoriaal bestjoert…
in swarte krie dy’t frede koert.
De krie fret fierwei ’t measte
út it easten wei, wat him berikt
by slingerjende paden lâns,
hy skrast it nep-nijs ’t westen oer,
wat rynsk beleanne wurdt mei foer.
Lit net de krie de earste
wurde, wat er sels it leafst berikt,
dan giet it demokratysk mis,
wurdt diktatoriaal bestjoerd
troch ’t rôfbist dat fiktoarje koert.
Foto ‘Swarte krie’
maart 30, 2024
Syn bertestjer joech strieljend ljocht,
lykas de wizen witte lieten,
sa’nien waard doe wrâldferneamd
en soe syn ljocht grif skine litte,
mar it is de fraach wat hy hjoed docht.
Hy wie in Joad, gjin moadegril
woe hy de minsken hearre litte,
mar de wierheid, dy’t men neamt
te radikaal, dus lit mar sitte,
op Goed Freed briek men syn lea en wil.
Op Peaskemoarn, sa’t men doe sei,
kaam hy it grêf út, wer ta libben,
rekke dêrtroch wrâldferneamd,
syn ynfloed koe men amper mjitte,
’t is de fraach hoe sit it hjoed de dei?
De Joadestjer mist hjoed it ljocht
en alle grêven bliuwe sletten,
opstean docht men yn de wrâld
tsjin ûnrjocht lykas hy ek witte
liet en die, de fraach is wa’t dat docht.