De loft wie swier fan wetter,
gewicht dat spatte del
op statebosk en tsjerke
fan alle kanten wel,
dy’t kolkte en net folle letter…
… riisde ’t peil fan sleat en feart
by wynstil waar ynienen
spegeljend de wolkeloft,
ynliste tusken griene
reiden en it duorre net sa’n skoft…
… as op ‘e diken streamde
it folk nei feilich oard,
de lêste klom nei boppen,
hy miste bus en boat
en siet op hege toan te roppen…
… oant de himel klearre op,
ien wolk noch, yn in lôge
kleurjend read nei violet
en sjoch hoe’t beide bôgen
ha beskaafd de hege status set…
… mar heger noch as state
stie slank de tsjerketoer
en hat doe net de bôge,
al wie it mar fan koarte doer,
de hoop foar hiel Ysbrechtum skôge?
|
