Willem Tjerkstra’s thússide

Archive for the Skiednisbylden category

admin

Gloaroarloch

Skiednisbylden

fan ûnbekend*
fan ûnbekend**

In himelwolk is goed foar rein,
ferkuollet nei in hjitte dei,
in ierdewolk knypt strôten ticht,
sa komt men oan in kweade ein.

Gjin gas as wapen yn de striid,
mar libben se dy ôfspraak nei?
Fritz Haber seach it as syn plicht
it út te finen, want de tiid…

… rûn troch, de fijân moast derút,
mei gauwens út ’e fuorgen wei,
mei gloar ferlear er alle sicht,
wat achterbleau, wie deade bút.

By Ieper waaiden wolken oan,
earst op ’e Frânsen ta, doe nei
de Kanadezen, gjin gewicht
hie ’t gas… hoefolle binne stoarn?

Swier wie it tellen, om ’e nocht,
want fuorgesifers rûnen troch
elkoar en dogge dat no noch…
wa’t achterbleau, hat noch lang socht.

* Foto ‘Gifgasoanfal’
** Foto ‘Gifgasoanfal op ’e Kanadezen’

admin

Edith Cavell’s moreel

Skiednisbylden

fan ûnbekend*
fan ûnbekend**



Wie Edith Cavell lykas Nightingale
in mem foar de soldaten
of wie sy in Ingelske spion?
It hong der mar fanôf
mei wa’t men dizze saak beprate.

De dûmnysdochter hie in heech moreel,
wie soarchsum foar de siken,
hiele djippe wûnen fan de kriich,
se liet har yn as frou
mei grinsoerrinnend wurk, die bliken.

Soldaten brocht sy oer de grins,
droech oer de ynformaasje
dy’t se fan ferwûne Dútsers kriich,
bleau trou oan har moreel
en ’t leger fan de Britske naasje.

Foar Dútsers gie sy troch foar ’t minne mins
en doe’t sy finzen rekke,
ûndergie sy ’t lot fan in spion,
gjin ear foar ‘Nightingale’,
it skot koe har moreel net brekke.

* Foto ‘Edith Cavell’
** Foto ‘Begraffenis fan Edith Cavell’

Archief

Zoeken

  • Categorie

  • Datum