juni 11, 2017
fan Marc Chagall*
fan ûnbekend**
Wêrom binne party Joaden berne
fier fan hûs, yn ’t bûtenlân,
ha ’t swierder as gewoanwei hân
en moasten mar oan minder wenne?
Wêrom koene sy net wenjen bliuwe
yn ’t beloofde, eigen lân?
Se holden troch ’t geweld net stân
en lieten har as skiep ferdriuwe.
Wêrom ha dy oaren har ferjage,
slimmer noch, de dea yndreaun?
Oerein is sels gjin wente bleaun,
der komt gjin ein oan al dy fragen.
Wêrom moasten sy de wrâld oer swalkje,
oeral hinne, nearne thús,
ferslein, de takomst faak oan grús,
wa hie begrutsjen mei dat folkje?
Dêrom ha sy nei de pogrom nommen
dit beslút: werom nei ’t lân
dêr’t foarfaars holden moedich stân,
se binne yn har wrâld wer kommen.
* Marc Chagall ((1887-1985)
Skilderij ‘It brânende doarp’
** Foto ‘Deaden nei in pogrom’
juni 4, 2017
fan ûnbekend*
fan ûnbekend**
Scortt koe oer syn earste reis fertelle,
nei de twadde bleau it stil
fanwege ’t iisgrêf op Antarktika.
Robert Scott hie jong ’t kadetskip helle,
trettjin wie er, sterk fan wil
en mei it eachweid oer Antarktika.
Hy waard lieder fan de ekspedysje,
’t gie foaral om wittenskip,
mar Scott woe ek graach nei de Súdpoal ta.
Skys en hûnen koene alles hysje,
dat it skip waard gau in stip,
dochs woe de poal noch gjin ûntdekkers ha.
Nei twa winters foer ’t skip wer oer weagen
nei it noarden mei ’t ferhaal
oer ’t kâlde witten… mar de Súdpoal nea…?
Op in twadde reis kaam dy foar eagen,
’t waard Scotts alderlêste haal:
in ivich swijen nei in wrede dea.
* Foto ‘Robert Falcon Scott’
** Stânbyld ‘Robert Falcon Scott’