juli 15, 2018
fan ûnbekend*
fan ûnbekend**
Hy wie gjin Afrikaan,
mar hat in eigen stimpel set
op paskes fol diskriminaasje;
fûl fulminearjend tsjin de wet
joech hy de rjochtsgong faasje.
Hy wie fan heech komôf
yn Yndia, mar yn de wrâld
brocht hy lykweardigens nei foaren;
geweldleas focht er foar ’t behâld
fan eigen folk én oaren.
Syn kleur wie oars as yn
Súd-Afrika joech oan de wet;
hoewol’t er heechhold rjocht en graasje,
waard Gandhi út ’e stoomtrein set…
in wolk fan argewaasje.
Syn stim spriek fan ferset
tsjin fingerôfdruk op ’e kaart,
foar Yndiërs dé registraasje;
sy hiene by syn hâlding baat,
in foarm fan demonstraasje.
* Foto ‘Mahatma Gandhi’
** Stânbyld ‘Mahatma Gandhi’
yn Jehannesburch
juli 8, 2018
fan Henri Matisse*
Weevje kleuren troch it libben,
streekje dy ek op it doek
lykas se binne, yn it neaken,
wat net strykt mei it gebrûk
fan op blau wetter falle drippen.
Lit Matisse fleurich streekje,
as er sin hat ek mar wyld,
de wylden binne him ta beaken,
hy foldocht net oan it byld
fan blau is ’t wetter fan it beekje.
Skilder fan metamorfoaze,
weevje ôf mei de krityk
oer blauwe dame yn it neaken,
want gjin foarm komt oer as bryk,
’t model hat in klassike poaze.
* Henri Matisse (1869-1954)
Skilderij ‘Blau neaken’