Willem Tjerkstra’s thússide

Archive for the Skiednisbylden category

admin

Nei abstrakt

Skiednisbylden

fan Constantin Brancusi*



Op knibbels mei de holle del,
de ienfâld strielet út dit stal,
wat is yn sa’n gebed bekend,
gjin minske spilet dan in rol
by ’t grêf, sjedêr dit monumint.

Brancusi** fielde oan de tiid
fan spanning yn de minskewrâld,
de takomst wie noch ûnbekend,
de ienfâld krong út mannichfâld,
mar oan abstrakt wie men net wend.

Lit dan ’t gebed de oanstjit jaan,
it stille wurd, dat men net sjocht,
oan Him, abstrakt, net yn de trend
fan wat de wrâld oant no ta brocht,
de ienfâld fan dit monumint.

* Constantin Brancusi (1876-1957)
Byld ‘It gebed’

** De Roemeenske byldhouwer
Constantin Brancusi

admin

Russyske folkswil

Skiednisbylden

fan ûnbekend*

It wie in tiid fan revolúsje,
opstân tsjin de eallju en de tsaar
en dêrnei de reaksje
mei geweld, dêrby rûn elk gefaar.

Troch deportaasje, ekskekúsje
kamen withoefolle boargers om,
gjin sprake mear fan aksje,
Russyske ferhâldings bleauwen krom.

Dochs kaam der stadichoan feroaring,
yn Europa stie de tiid net stil,
wat frege om reaksje
tsjin tsaar Nikolaas syn macht en wil.

De Doema** wie foar him fertoaning
fan de folksgeast, inkeld foar in part:
it folk as lytse fraksje,
grut de macht fan wa’t it measte hat.

De Doema wie mear as yllúzje,
dus smiet Nikolaas de doarren ticht,
wat frege om reaksje:
wer in revolúsje kaam yn sicht.

* Foto ‘ Iepeningstaspraak fan tsaar Nikolaas II
yn 1906 foar de earste Doema’

** It Russyske parlemint

Archieven

Zoeken

  • Categorie

  • Datum