Archive for the Skiednisbylden category

Moard op kening Karel I

fan ûnbekend*

Kening Karel mei in Dútsk postuer
en mear as trettjin nammen
waard de foarst fan Portugal,
syn dieden wiene soms ûnhuer,
mar dêr hat hy him nea foar skamme.

Under wetter die er ûndersyk,
as wiere seeferkenner
spile hy in helderol,
socht bûten ’t houlik syn ûntwyk,
wie diktatoriaal, in menner.

Sosjalist en ek republikein
ha kening Karel hate,
wat ûntflamme ta in skot,
it waard foar heit en soan de ein,
de moardners ha ek nea mear praten.

* Skilderij ‘Kening Karel I’

Liet fan Fertsjinste

fan ûnbekend*

Se leit no sels op bêd
en hat gjin krêften mear
om neisten help te bieden,
heart noch har rappe trêd,
is nea mei earder klear,
kin fan har folk net skiede.

Hoewol’t se neat mear sjocht,
krijt sy it unifoarm
foar eagen yn de jierren
fan skot nei skot, ’t gefjocht
dat útrûn op in stoarm,
dy’t bystân iepenbierre.

Sy stie se rêstich by,
ferwûnen út ’e striid,
en bleau om oan te hearren,
wat die har faakris nij:
de geast sa djip en wiid
foardat soldaten stjerre.

Se wit, har eigen tiid
rint stadich nei de ein;
de Oarder fan Fertsjinste
klinkt as har eigen liet,
dêrmei is alles sein…
sy stie ek by de minsten.

* Yllustraasje ‘Florence Nightingale’