Willem Tjerkstra’s thússide

Archive for the Skiednisbylden category

admin

Afghanistan eigen baas

Skiednisbylden

fan ûnbekend*
fan ûnbekend**

Afghanistan, lân tusken bergen,
heech hiesto it yn de kop,
woest eigen wetten folgje,
ek as ’t gie oer ’t bûtenlân,
mar mis, de Britten spilen heger op.

It wie foar emir Habibullah
net genôch foar ’t eigen lân
om ’t Britske ryk te folgjen
yn it bûtenlân, hy brocht
it yn petear, mar fierder neat ta stân.

Afghanistan, lân fan de wapens,
leech leisto de fijân del,
mar ek dyn eigen emir
yn it binnenlân, de moard
liet sjen dat wurden wiene net yn tel.

Syn soan waard emir, Amanullah
gie de striid oan mei de Brit
om eigen baas te wurden
oer ’t beleid foar ’t bûtenlân,
wat slagge nei in fearnsjier bloed en swit.

* Foto ‘Habibullah’
** Foto ‘Amanullah’

admin

Pierre-Auguste Renoir

Skiednisbylden

fan ûnbekend*
fan Pierre-Auguste Renoir**

Syn libben, fol ympresjes,
makke Pierre-Auguste ferneamd,
hy seach it ljocht yn alle kleuren,
troch syn hân is ’t op ’e doeken streamd.

Hy siet mei stive fingers
stil te wachtsjen op ’e dea,
nei fjouwertûzen skilderijen
krong de reuma pynlik troch de lea.

Twa soannen, ynvalide
troch de oarloch, droech er mei,
it kriichsgeweld koe gjin meilijen,
’t makke yndruk op syn âlde dei.

Syn fingers wiene linich
doe’t er om him hinne seach
om op te heinen yn de kleuren
ljochteffekten, boarnen foar it each.

Syn jonge dagen streamden
net oerfloedich nei de jûn;
de dea joech oan syn keunst de wearde
fan ferneamdens, mear as ien miljoen.

* Foto ‘Pierre-Auguste Renoir’
** Skilderij ‘Selsportret’

Archief

Zoeken

  • Categorie

  • Datum