Archive for the Polityk category

Hy bespile ús mei noarm en wearde,
falske noaten by sosjaal
belied yn ’t CDA-ferhaal,
dat al te faak foar’t folk it evangeelje kearde.

Hiene wy it heil doe net ferwachte
fan it ôfskie fan it jild
dat sloech foar master op yn ’t fjild
fan bonushearen dy’t in oar syn bargen slachten?

Mar sjedêr hoe’t macht wer foarrang krije
soe op autentyk belied
sa’t yn dy wrâld wol faker giet,
it ôfskie fan prinsipes om yn ’t wyld te frijen.

Fryslân, wit do krijst in allochtoane
status mei dyn Frysk belied
sa’t yn dy wrâld wol faker giet:
it ôfskie fan de frjemdling, heil oan ’t autochtoane.

FNP, it ôfskie fan jim dichter
falt hjoed gear mei noch ien wins:
it ôfskie fan de wylde mins,
dan noch: de nije dichter dichtet justjes lichter.

It barde by de start fan ’t minskdom
dat yn ’t hôf de appel plôke waard
dy’t kennis joech fan goed en kwea,
doe stie de takomst op ‘e kaart,
in saak fan libben en fan dea.

’t Wie folle letter dat de winsk om
ien te wurden, honorearre waard,
’t appel op kristenstriders skreau
it CDA klear op ‘e kaart,
’t koe minder wat de kristen dreau.

Mar tiden hawwe tiden, ’t minskdom
sekularisearre, ’t CDA
dreau op ‘e weagen fan de tiid
mei nei globale baaien ta,
’t appel ferwaaide, sa’t soks giet.

En hieltyd minder waard de winsk om
ien te wêzen mei ’t profetewurd
fan Amos, fan professy boer,
hy griep it boltsje by de sturt,
it heidensk ûnrjocht wie him oer.

detail
Jean-Honoré Fragonard

Faak geane tiden op herhelling,
slûpt no ’t heidendom troch Nederlân
en brekt wyld út yn razernij
op folk dat libbet oan de hân
fan Allah, net fan de partij.

En hieltyd djipper wurdt de delling
tusken CDA en Amos’ wurd
foar flechtling, widdo en de man
dy’t ûnrjochtmjittich rekke wurdt,
it heidendom kaam yn de ban.

Doe briek de dei oan fan ’t oanbidden
fan it bollekeal troch ’t CDA
dat bûgde yn de wyldernis
foar dy partij om macht te ha…
de appel op appel… ’t wie mis.