Willem Tjerkstra’s thússide

Archive for the Mytebylden category

admin

Hadrianus

Mytebylden

fan ûnbekend*
fan ûnbekend**

Hadrianus, noch mar njoggen,
mocht al nêst de keizer stean,
dy seach yn him in generaal,
foar Rome fleanend as in earn.

Fan it easten nei it westen;
Syrië, dêr kaam er oan
om gûverneur te wurden, mar
nea waard er keizers wiere soan.

Dochs soe hy wol keizer wurde,
earst yn Syrië, dêrnei
yn Rome, gjin ferskil yn kar,
want elk rûn mei de keizer wei.

Hadrianus hat sanearre
wat yn Rome hold gjin stân;
hy boude timpels, fier oer see
in muorre, dwers troch Ingelân.

Fan it noarden nei it easten,
dêr’t de keizer makke mei
rebûlje yn Jeruzalem,
hy gie dêr as oerwinner wei.

Hadrianus waard fereale:
Antinoös stie nêst him;
de djippe Nyl waard him fataal,
de keizer hearde lang syn stim.

* Byld ‘Keizer Hadrianus’
** Byld ‘Antinoös’

admin

Hades

Mytebylden

fan ûnbekend*

Wurdt de namme Hades neamd,
dan glydt in rille oer de rêch
en sjocht men him al kommen
nei de Styx, dy’t stadich streamt,
it wolkom klinkt yn ’t deaderyk.

Mei twa broers hie hy de macht
oer ierde, see, it hiele al;
Poseidon, Zeus en Hades
joegen op it minskdom acht
en dêrom woe it wol omlyk.

Mar wa’t stoar, koe net werom,
in rille glied him oer de rêch,
hy moast nei Hades komme;
fearman Charon hold him stom,
de Styx oer wie der gjin ûntwyk.

Hades’ wolkom klonk iiskâld: 
‘Omdat ik rjocht en feardich bin,
lit ik gjinien ûntkomme,
altyd ha ’k itselde sin,
foar elkenien is ’t lot gelyk.’

Byld ‘Hades’ 


Archieven

Zoeken

  • Categorie

  • Datum