februari 21, 2020
fan ûnbekend*
It wiene goede maten,
dy’t in hekel hiene oan de macht
fan de iene oer de oare:
gjin ferskil fan dei en nacht.
Twa bruorren wiene machtich,
hearsken oer Athene as altyd;
ien woe ien fan har bekoare,
mar dy maat rôp op ta striid.
Ien broer waard doe fermoarde,
mar de oare bleau oan it bewâld;
fan it iene kaam it oare:
beide maten rekken kâld.
It wiene goede maten,
dy’t fermoarde waarden troch de macht
dy’t sy net bekoare koene…
in ferskil fan dei en nacht.
* Bylden ‘De Tyrannicides’
In Romeinske kopy fan in Gryksk byld
februari 14, 2020
fan ûnbekend*
As strider koe syn rom net stikken,
nei frijheid rikkend gie er op ’e flecht
fan ’t iene lân nei ’t oare,
mar doe’t Rome drige mei de dea,
liet eigen gif him stikke.
Kartago droech him earst op hannen,
want foar syn stêd soe hy nei Rome ta;
men seach, mei oaljefanten
oer de Alpen, sa’n beklimming nea,
it soe der dus om spanne.
Twa kear fersloech er de Romeinen,
kaam foar de poarte fan de stêd fan stân,
mar mei syn kommandanten,
sûnder oaljefanten, kearde hy
werom, net as fersleine.
Ferslein waard Hannibal by Sama,
tichtby Kartago, ’t foarlân wie de flecht
fan ’t iene lân nei ’t oare,
syn gefoel liet witte: nea wer frij!
De gifdea wie in drama.
* Byld ‘Hannibal’