Willem Tjerkstra’s thússide

Archive for the Mytebylden category

admin

Decius Mus

Mytebylden

fan Peter Paul Rubens*

Ien fan de trije generaasjes
mei deselde namme yn it ryk
fan Rome: Decius,
dy’t konsul en ek fjildhear wie,
grut wiene syn prestaasjes.

’t Gie tsjin de Kelten en Etrusken,
’t meunsterbûn oan Romes macht gelyk,
in slach foar Decius,
dy’t yn in dream wist wêr’t er stie,
hy kaam der stridend tusken.

De Kelten krongen fier nei foaren,
dat foar Decius wie gjin ûntwyk,
hy rôp de goaden oan,
woe dat hysels it offer wie
en sparre sa de oaren.

Syn heit en pakesizzer wiene
like moedich yn ’t Romeinske ryk…
har namme: Decius.

* Peter Paul Rubens (1577-1640)
Skilderij ‘De dea fan Decius Mus’

admin

Dareios

Mytebylden

fan ûnbekend*

Sân pretendinten foar de troan
fan Perzië… wa soe it wurde
wie de fraach… der wie gjin keningssoan,
gjin swurden waarden lutsen.

Sân hynders kamen út ’e stâl
noch foar it rizen fan de sinne;
joech in hynder lûd, it heart no mâl,
dan wie de kening keazen.

Dareios’ hynder wrinzge lûd
by ’t rûken fan syn leave merje,
foar syn ruter wie de keningsgroet
fan seis, dy’t fierder swijden.

De Perzen teagen yn de striid,
dy’t sy by Maraton ferlearen
fan de Griken, wat gie troch de tiid
as slach fan ’t hymjend draven.

Dareios joech gjin inkeld lûd,
lykas syn hynder net mear wrinzge.

* Ofbylding ‘Dareios/Darius I’

Archief

Zoeken

  • Categorie

  • Datum