Willem Tjerkstra’s thússide

Archive for the Mytebylden category

admin

Eros

Mytebylden

fan William Adolphe Bouguereau*

Soargjend foar in sterk ferlet
fan iten, drinken, sliepen, frijen,
fleach hy fan de iene nei de oar
mei pylk-en-bôge om te treffen,
dêr wie Eros ier en letter foar.

Aphrodite wie syn mem,
goadinne fan de frije leafde,
liet him witte wêr’t er hinne moast
om mei de pylken doel te treffen:
’t hert, dus mikte Eros op it boarst.

Pylken mei in gouden punt,
dy soargen foar in djipgeand frijen,
hie in pylk lykwols in punt fan lead
sa’t Daphne trof, sy soe beseffe
dat it rekke op ’e kop ferkeard.

Psyche trof in gouden punt
en koe it lok net op, de leafde
kaam fan Eros, dy’t sels troffen waard
troch Psyches skientme, mei har houlik
hiene beide by de leafde baat.

* William Adolphe Bouguereau (1825-1905)
Skilderij ‘Eros en Psyche’

 

admin

Erinyen

Mytebylden

fan William Frederic Bouguereau*

Wol soargje foar de goede oarder,
want dan giet it libben net ferlern
en sil it oan wolwêzen winne,
wat troch de goaden is te sjen,
sa net, pas op foar wraakgoadinnen.

De Erinyen yn de ierde,
berne út Ouranos’ manlik bloed,
sy dûkten op as wraakgoadinnen
en brochten elkenien yn noed
dy’t yn ’t bestean keas foar it minne.

Sy namen mei de glêde slangen,
kronkeljend de moardners achternei,
dy’t dêrtroch rekken bûten sinnen;
it rjocht keas foar in oare wei,
dy oarder liet gjin moardner rinne.

* William Frederic Bouguereau (1825-1905)
Skilderij ‘Orestes narre troch de wraakgoadinnen’

Archief

Zoeken

  • Categorie

  • Datum