Willem Tjerkstra’s thússide

Archive for the Mytebylden category

admin

De Argonauten

Mytebylden

fan Jean-Francois Detroy*

De opdracht wie foar fyftich helden,
farrend op de ‘Argo’ withoefier,
gjin langstme mear nei ’t folkje thús:
‘Manmachtich binne jim as Argonauten,
helje op it gouden flues!’

De aventoeren dy’t se telden,
wiene net te hâlden op ien hân:
mei froulju, fjochters en frjemd folk,
manmachtich wiene sy as Argonauten,
sjoen troch goaden op har wolk.

De trochgong tusken blauwe rotsen
waard earst hifke mei in rappe do,
doe foer de ‘Argo’ like rap
dertroch, manmachtich hearden Argonauten
achter har de stiennen klap.

Koe lokjend roppen ’t skip dan botse
litte? Orpheus song der dwers tsjinyn,
fersloech sa hiel ’t Sirenefolk,
manmachtich bleauwen sy as Argonauten,
sjoen troch goaden op har wolk.

De opdracht foar de fyftich helden
waard foltôge mei it gouden flues
en langstme nei it folkje thús.

* Jean-Francois Detroy (1679-1752)
Skilderij ‘De fangst fan it gouden flues’

 

admin

Ares

Mytebylden

fan ûnbekend*



As soan fan Zeus liet hy him jilde:
striidber, stribjend nei gesach en rom,
sjedêr de god fan oarloch, Ares,
mei syn toarst nei minskebloed…
syn slach ferrûn faak krom.

Hy keas de kant fan de Trojanen,
wylst Athena hold it mei de Gryk,
in goadestriid yn de famylje;
Ares kaam yn harsensnoed,
mar waard noch krekt gjin lyk.

De oarlochsgod koe wol ferliede:
Aphrodite loek er op syn bêd,
wat striid oprôp mei har Hephaistos,
smid mei izer yn it fjoer,
hy fong it pear yn ’t net.

Hephaistos nûge alle goaden
út om nei it bleate pear te sjen,
wat útrûn op homearysk laitsjen;
Ares’ leafdesstriid wie oer…
hy hie de slach ferlern.

* Byld ‘Oarlochsgod Ares’

Archief

Zoeken

  • Categorie

  • Datum